Scríbhneoir cónaithe, Ollscoil Mhá Nuad

Iarrann Ollscoil Mhá Nuad agus Seirbhísí Leabharlainne agus Ealaíon Chomhairle Contae Chill Dara iarratais le haghaidh Scríbhneoir Cónaithe Gaeilge don bhliain acadúil 2026–27.

Beidh fáilte roimh iarratais ó scríbhneoirí a bhfuil réimse saothar ar ardchaighdeán foilsithe acu agus a bheadh inchurtha leis an ról seo atá cómhaoinithe ag Ollscoil Mhá Nuad agus Seirbhísí Leabharlainne agus Ealaíon Chomhairle Contae Chill Dara. Mairfidh an tréimhse chónaitheachta ó Mheán Fómhair 2026 go dtí Lúnasa 2027, agus táthar ag súil go mbeidh dualgais suas le 6 uair an chloig, ar an meán, in aghaidh na seachtaine am teagmhála le mic léinn agus leis an bpobal i gcoitinne. Dearadh an ról chun deis a thabhairt do mhic léinn agus don phobal i gcoitinne bheith ag plé le scríbhneoirí aitheanta, chomh maith le ham a thabhairt do na scríbhneoirí a dtionscadail reatha féin a chur chun cinn. Oirfidh an post do scríbhneoirí a bhíonn ag plé leis an bhfilíocht, an drámaíocht, nó leis an bprós cruthaitheach.